香港人去日本愈去愈刁鑽，東京每逢有新野食新野買唔駛一星期已經係「無人不識」，北海道、大阪、沖繩去過曬，京都、名古屋大家都去過既話，唔知你又有無去過呢2個城市之間既「滋賀縣」？
於2017年琵琶湖長浜市及米原市聯合選出左8個位於琵琶湖北部既景點「湖北八景」，可以俾旅客充分感受、了解湖北地區既魅力。今次粹日本小編為大家整理湖北八湖詳細資訊，點樣去、點樣玩，仲有地圖資訊、靚相引誘你~
點樣去
湖北八景位於長濱市（長浜市）及米原市境內，從京都站可以坐JR琵琶湖線（新快速, 51分鐘）或新幹線（21分鐘），從名古屋站可以坐JR東海道本線（Hikari、Kodama, 25分鐘）。
其他前往方法（限日語）： http://kitabiwako.jp/access/
米原市2景
伊吹山
伊吹山係日本百大名山之一，位於琵琶湖國家公園內，標高1377.3米，亦係今次既「湖北八景」所在既滋賀縣中最高既山。
自行登山的話估算所需時間為單程3.5小時，山頂氣溫一般比山腳要低近10度，即使係夏天登山都記得要做好防寒準備。
同富士山類似，響山頂設有5家俾你小休既「山小屋」，因為小屋無電話既關係，不設預約先到先得，費用為成人1500円，小學至高中生1000円（凌晨過後入住要多付500円）。夏季以外有可能不營業。
至於自駕遊就可以利用伊吹山Driveway，由山腳直上山頂停車場。道路營業時間按季節有所不同，可以參考呢個網頁。使用該自動車道需要付費，費用請參考此頁面。
當然付出是有回報的，除左可以快D、輕鬆D到達山頂外，途中仲有一連串既景色可以睇，官方網頁有列明大概位置。
山頂既花田非常有名，甚至仲有天空之花田（天空の花畑）既稱號，難得上到山點可以唔睇餐飽！
中山道醒井宿
所謂既「宿」即係驛站，醒井宿係過去連接東京日本橋以及京都三條大橋，江戶時代既五街道之一。至於「醒井」之名則是出自日本古代傳說既「居醒清水」。
醒井宿一帶有唔少精彩景點，以下為大家送上其中一D精選，感受一下醒井的景色。
地蔵川
舊醒井郵局局舍（醒井宿資料館）
夏之醒井
長濱市6景
長濱城
長濱城為日本戰國時代鼎鼎大名既「豐臣秀吉」所擁有既第一個城池，雖然於江戶時期被廢城，現時則作為歷史博物館開放予公眾參觀。城中五樓有可以眺望琵琶湖既展望台，可以感受到當年秀吉一戰天下的威風。
每年7月至8月舉行既北琵琶湖煙花大會（北びわ湖大花火大会）於長濱城都可以睇得到，城郭與煙火更添美麗。
竹生島
僅次於沖島為琵琶湖內第二大島，漢字名係源自島形係樂器的「笙」，由笙變「竹生」而得名。
竹生島上既必要景點係島上既「寶嚴寺」，寺內供奉既弁才天同江之島、嚴島既弁才天合稱「日本三大弁才天」，而要去寶嚴寺就要先登上165級樓梯，少啲毅力都唔得。
走過舟廊下就會到達「都久夫須麻神社」，其本殿為日本國寶，可以從中窺見過去安土桃山時代既藝術文化特色。
余呉湖
周長約6.4km的余吳湖四季各有景色，沿著導水路有余呉川堤櫻花（余呉川堤の桜），於開花季節可以睇到櫻花同油菜花爭艷鬥麗。而冬天就以釣西太公魚著名。此外不時會有地域活動舉行，如余吳湖祭、「健康馬拉松」等，除了睇景外亦可以親身體驗該地既風俗文化。
小谷城跡
過去為「中世五大名城」之一，雖然現時只剩下遺跡（城跡），依然可以去懷緬一番，而該處春時可見櫻，秋能賞紅葉，亦是觀賞自然的好地方。
作為戰國大名淺井曾經既城池，小谷城跡中立有「淺井長正公自刃之碑」，
亦有「小谷城戰國歴史資料館」俾你了解戰國時代更多；喜愛走訪歷史勝地的話記得不要錯過。
雞足寺（舊飯福寺）
山岳佛教聖地「己高山雞足寺別院」之一，雖然現已經廢寺，改由說地住民管理，至今依然係當地有名名勝之一；當中尤以秋天時既紅葉最為著名，紅葉與參道石階、古老石垣共繪幽玄之畫的景色。
秋之紅葉與雞足寺
冬天的雪中雞足寺
湖岸絕景景點（湖岸道路・豐公園・水鳥公園）
最後一個「湖北八景」係琵琶湖湖岸三個景點既合稱；從湖岸道路以及豐公園可以欣賞到夕陽映照下既琵琶湖湖面景色，作為日本最大湖泊，從左到右景致一望無際；而從較北既水鳥公園向湖方向遠望，則可以睇到竹生島以及琵琶湖既「浮島」現象（海市蜃樓）。
想了解多啲琵琶湖既話可以睇呢度。
睇完心動，打算下次去關西時留番一兩日去玩盡湖北八景？北琵琶湖網頁俾你更多當地旅遊資訊，一於發掘屬於你既秘境清單！
想針對湖北八景了解多D既話可以去長濱・米原・奥琵琶湖觀光情報網既專頁。
另外湖北八景亦有自己既官方Twitter，雖然是用日語放送，一於靠睇漢字了解最新情報！
