香港人返鄉下時多得中文同日文中部份共通既漢字，號稱「唔識日文都可以睇得明三成」。除左行街買野、餐廳點菜時可以用手指指解決之外，手勢仲可以幫到你表達一D簡單既要求同目的。唔識日文/懶得講野？記低以下既手勢。
埋單打交叉
日本現時唔少連鎖店都有引入tablet點餐，而且「多得」人口老化勞動力不足，外國籍店員愈黎愈多，響連鎖店/遊客區遇到問題都不大。
而其他餐廳則多數只有日語餐單，點餐時可以用手指指，想要埋單時點算好？同香港可以用「畫圓圈」黎解決一樣，日本一樣有一個埋單專用手勢，萬試萬靈。
做法非常簡單，只需要用兩隻食指擺成一個交叉就得。記得唔好用其他手指，亦唔好用成件手擺交叉做鹹蛋超人。（用手臂擺出既交叉代表「NO」、「唔需要」）
日本餐廳既奧秘又點止打交叉埋單咁簡單？想知多D既話可以參考我地另一篇文章：
https://press.ikidane-nippon.com/hk/a00217/
數數字從「6」起要留意
用手勢表示數字從1到5問題不大，只係去到6開始就要小心！
香港人習慣由1到10都用單手解決，而日本人既比數字方法用一隻手係唔ok既。例如我地既「六」：
對於日本人黎講係「電話」或者「aloha」，無論你用幾明顯既方法做個「六」既手勢，所有日本人都只會覺得你用力aloha緊 ……
正確既「六」係咁既⇓而7~10就係繼續加手指即可。
否認時與其搖頭不如fing手
想要表示否認時除左可以搖頭以及轉移視線之外，仲有咩野好方法？
日本人做法係，除手放響面前做出手刀，然後以手腕/手肘為圓心左右fing~~~即可。幅度唔需要太大，大約同你塊面同樣闊就得。呢個fing手手勢可以用黎表示否認，錯誤，日本人響自謙時亦常會用到。
手刀第二式之分紅海
手刀打橫fing係代表否定，而前後fing則係「借歪」既意思。想要響人海之中分出一條路既時候可以使用呢個手勢加一聲「すみません」（sumimasen），無往而不利。
記得唔好真係向前斬！搖擺幅度唔需要大，稍為fing下就得。
原來如此！
最後教大家一個雖然旅行途中唔會點有機會用到，但日本人日常生活中會使用既手勢。
用手輕擊另一隻手既手心代表「原來如此」（なるほど）既意思，就好似呢家學識左幾種日本人會用既手勢之後，你就可以即席做一個「原來如此」既手勢黎表示自己學到野啦~
發現文章有任何問題請話俾小編知☞ 回報表格
